खेड-राजगुरुनगर : पुणे-नाशिक महामार्गावरील वाकी, संतोषनगर परिसरात जानेवारी २०१८ मध्ये झालेल्या गंभीर अपघातप्रकरणी नारायण विठ्ठल वाफारे यांची खेड येथील प्रथमवर्ग न्यायदंडाधिकारी न्यायालयाने निर्दोष मुक्तता केली आहे. न्यायदंडाधिकारी श्रीमती जे. सी. गुप्ता यांनी ११ ऑगस्ट २०२६ रोजी हा निकाल दिला.
या प्रकरणात आरोपीविरुद्ध भारतीय दंड विधानाच्या कलम २७९, ३०४-अ, ३३७, ३३८ तसेच मोटार वाहन कायद्याच्या कलम १८४ अन्वये आरोप ठेवण्यात आले होते. अभियोग पक्षाच्या म्हणण्यानुसार, २१ जानेवारी २०१८ रोजी दुपारी सुमारे १.३० वाजता वाकी गावाच्या हद्दीत पुणे-नाशिक रोडवर वॅग्नर कारने मोटारसायकलला धडक दिल्याने संदीप बाळकृष्ण शेलार यांना गंभीर दुखापत झाली आणि उपचारादरम्यान त्यांचा मृत्यू झाला. या अपघातात त्यांच्या पत्नी व मुलालाही दुखापत झाल्याचे न्यायालयीन नोंदीत नमूद आहे.
अभियोग पक्षाने या प्रकरणात एकूण पाच साक्षीदार तपासले. मात्र, न्यायालयाने पुराव्याचे परीक्षण करताना महत्त्वाच्या त्रुटी निदर्शनास आणल्या. फिर्याद स्वतंत्र साक्षीदारामार्फत पुरेशा पद्धतीने सिद्ध करण्यात आलेली नसल्याचे न्यायालयाने नमूद केले. तसेच प्रमुख साक्षीदाराच्या उलटतपासणीत तिच्या प्रत्यक्ष जबाबातील काही महत्त्वाच्या बाबी आधीच्या जबाबात नमूद नसल्याचे स्पष्ट झाले.
तपास अधिकाऱ्याच्या साक्षीवरूनही अपघाताच्या वेळी वाहन भरधाव किंवा निष्काळजीपणे चालवले जात असल्याचे दर्शविणारे ठोस पुरावे समोर आले नसल्याचे न्यायालयाने नमूद केले. घटनास्थळी रक्ताचे डाग किंवा वाहनाच्या टायरच्या खुणा आढळल्या नसल्याचे, तसेच सीसीटीव्ही फुटेज उपलब्ध झाले नसल्याचेही तपास अधिकाऱ्याच्या उलटतपासणीत स्पष्ट झाले. याशिवाय, मृत्यूचे कारण व वाहनामुळे झालेल्या दुखापती सिद्ध करण्यासाठी वैद्यकीय अधिकाऱ्याची साक्षही अभियोग पक्षाने नोंदवली नसल्याचे न्यायालयाने नमूद केले.
न्यायालयाने पुढे स्पष्ट केले की, केवळ वाहन ‘भरधाव वेगाने’ चालवले जात होते, असा आरोप केल्याने वाहनचालकाने निष्काळजीपणा किंवा बेदरकारपणा केला हे सिद्ध होत नाही. सर्वोच्च न्यायालयाच्या विविध न्यायनिर्णयांचा संदर्भ देताना, वाहनाचा वेग हा संबंधित ठिकाणच्या परिस्थितीच्या तुलनेत अतिवेगवान होता हे ठोस पुराव्याने सिद्ध करणे आवश्यक असल्याचे न्यायालयाने अधोरेखित केले.
अखेर अभियोग पक्ष आरोपीविरुद्धचा गुन्हा भक्कम, विश्वासार्ह आणि निष्पक्ष पुराव्याने सिद्ध करण्यात अपयशी ठरल्याचे नमूद करत न्यायालयाने आरोपी नारायण विठ्ठल वाफारे यांची सर्व आरोपांतून निर्दोष मुक्तता केली.
न्यायालयाच्या आदेशानुसार, आरोपीचा जामीनकदबा रद्द करण्यात आला असून, फौजदारी प्रक्रिया संहिता कलम ४३७-अ अन्वये अपील कालावधीसाठी १५ हजार रुपयांचा वैयक्तिक जातमुचलका व जामीनकदबा दाखल करण्याचे निर्देश देण्यात आले आहेत. तसेच जप्त करण्यात आलेली वॅग्नर कार अपील कालावधीनंतर मूळ मालकास सुपूर्द करण्याचे आदेश देण्यात आले आहेत.
या प्रकरणात आरोपीतर्फे विधिज्ञ श्री.निलेश बी.आंधळे व श्री.प्रमोद एस. सहाणे यांनी काम पाहिले, तर अभियोग पक्षातर्फे विधिज्ञ श्रीमती ए. एस. चव्हाण – थोरात यांनी बाजू मांडली.
