📰 नारायणगावात दोन गावठी कट्टे व जिवंत काडतुसांसह तिघांना अटक; स्थानिक गुन्हे शाखेची धडाकेबाज कारवाई

📰 नारायणगावात दोन गावठी कट्टे व जिवंत काडतुसांसह तिघांना अटक; स्थानिक गुन्हे शाखेची धडाकेबाज कारवाई

नारायणगाव (ता. जुन्नर) – पुणे ग्रामीण जिल्ह्यात बेकायदेशीर अग्नीशस्त्रांवर आळा घालण्यासाठी सुरू असलेल्या मोहिमेअंतर्गत स्थानिक गुन्हे शाखेने मोठी कारवाई करत दोन गावठी कट्टे (पिस्टल) व जिवंत काडतुसांसह तिघांना अटक केली आहे.

पोलिस अधीक्षक संदीप गिल्ल यांच्या मार्गदर्शनाखाली आणि स्थानिक गुन्हे शाखेचे वरिष्ठ पोलीस निरीक्षक प्रमोद क्षीरसागर यांच्या नेतृत्वात ही कारवाई करण्यात आली.

मिळालेल्या माहितीनुसार, स्थानिक गुन्हे शाखेचे पथक जुन्नर विभागात गस्त घालत असताना सहाय्यक पोलीस निरीक्षक महादेव शेलार यांना गोपनीय बातमी मिळाली. त्यानुसार नारायणगाव पोलीस स्टेशन हद्दीतील कारफाटा, निमगावसावा परिसरात सापळा रचण्यात आला.

या सापळ्यात राहुल सुरेश साळवे (रा. साकोरी तर्फे बेल्हे, ता. जुन्नर) याला त्याच्या दोन साथीदारांसह अटक करण्यात आली. त्याच्यासोबत दर्पण सुरेश पवार (वय २२, रा. नारायणगाव) आणि तेजस संदीप मातेले (वय २१, रा. नारायणगाव) यांचा समावेश आहे.

तिघांची झडती घेतली असता राहुल साळवे व तेजस मातेले यांच्या कमरेला खोसलेले दोन गावठी कट्टे आणि दोन जिवंत काडतुसे जप्त करण्यात आली. तसेच त्यांच्या ताब्यातील MH 06 BE 4626 क्रमांकाची इर्टिगा कारही पोलिसांनी जप्त केली आहे. एकूण सुमारे ५ लाख ७२ हजार रुपयांचा मुद्देमाल पोलिसांनी हस्तगत केला आहे.

या प्रकरणी नारायणगाव पोलीस ठाण्यात गुन्हा दाखल करण्यात आला असून आरोपींना वैद्यकीय तपासणीनंतर पुढील कारवाईसाठी पोलिसांच्या ताब्यात देण्यात आले आहे.

ही कारवाई अप्पर पोलीस अधीक्षक रमेश चोपडे आणि उपविभागीय पोलीस अधिकारी धनंजय पाटील यांच्या मार्गदर्शनाखाली पार पडली.

तसेच स.पो.नि. प्रवीण सपांगे, स.फौ. दिपक साबळे, पो.हवा. संदीप वारे व अक्षय नवले यांनीही या कारवाईत सहभाग घेतला.

👉 पुढील तपास नारायणगाव पोलीस करत आहेत.

Websites Views :