🚨 शिरूर तालुक्यात भीषण अपघात : वडील व चिमुकलीसह तिघांचा मृत्यू, पत्नी गंभीर जखमी

शिरूर : शिरूर तालुक्यातील नागरगाव हद्दीतील नलगेवस्ती चौफुला परिसरात भरधाव ट्रकने कारला दिलेल्या जोरदार धडकेत वडील व नऊ वर्षांची चिमुकली मुलगी यांच्यासह तिघांचा दुर्दैवी मृत्यू झाला, तर पत्नी गंभीर जखमी झाली आहे. ही हृदयद्रावक घटना शुक्रवारी (दि. १४ फेब्रुवारी २०२६) पहाटे १२.४५ वाजण्याच्या सुमारास घडली.

या प्रकरणी शिरूर पोलीस स्टेशन येथे ट्रक चालकाविरुद्ध गुन्हा दाखल करण्यात आला आहे.

मिळालेल्या माहितीनुसार, निमोणे (ता. शिरूर) येथील पवन राजहंस काळे (वय ३४), त्यांची पत्नी वंदना पवन काळे (वय ३०), मुलगी आराध्या पवन काळे (वय ९) तसेच मेव्हणा बाळासाहेब प्रकाश नागवडे (वय ३८) हे सेलेरो कारमधून (एम.एच. १२ एस.क्यू. ५४४१) चौफुला रोडने निमोणे येथे घरी जात होते.

दरम्यान, शिरूरकडून आलेल्या ट्रक क्रमांक एम.एच. ०९ ई.एम. २४६४ चा चालक धनराज काशिनाथ भिसे (रा. भिसे वाघुली, ता. जि. लातूर) याने भरधाव वेगात व वाहतूक नियमांकडे दुर्लक्ष करत कारला जोरदार धडक दिली. या अपघातात पवन काळे, त्यांची मुलगी आराध्या काळे आणि बाळासाहेब नागवडे यांचा जागीच अथवा उपचारादरम्यान मृत्यू झाला. तर वंदना काळे या गंभीर जखमी असून त्यांच्यावर उपचार सुरू आहेत.

या घटनेत दोन्ही वाहनांचे मोठ्या प्रमाणात नुकसान झाले आहे. याप्रकरणी संजय ज्ञानदेव काळे (वय ४२, रा. निमोणे) यांनी फिर्याद दिली असून ट्रक चालकाविरुद्ध भारतीय न्याय संहितेतील विविध कलमांखाली गुन्हा दाखल करण्यात आला आहे.

या प्रकरणाचा तपास पोलीस उपनिरीक्षक नकाते करत असून दाखल अंमलदार म्हणून पोलीस हवालदार भगत यांनी काम पाहिले आहे.

या अपघातामुळे निमोणे परिसरात शोककळा पसरली असून हळहळ व्यक्त केली जात आहे.

Websites Views :