📰 ब्रेकिंग न्यूज -भेसळयुक्त मँगो पल्प जप्त; खेड तालुक्यात अन्न व औषध प्रशासनाची मोठी कारवाई

राजगुरुनगर : खेड तालुक्यात अन्न व औषध प्रशासनाने मोठी कारवाई करत भेसळयुक्त मँगो पल्पचा साठा जप्त केला आहे. राक्षेवाडी येथील अविष्कार एंटरप्रायझेस आणि मावळ तालुक्यातील उरसे येथील महंमद एकरामुल उर्फ अक्रम गुलाम यांच्याकडून तब्बल अडीच लाख रुपयांचा मुद्देमाल जप्त करण्यात आला. या प्रकरणामुळे परिसरात खळबळ उडाली आहे.

अन्न व औषध प्रशासनाच्या कारवाईत मँगो पल्पसह भेसळयुक्त साखर, गाईचे दूध आणि केमिकलयुक्त केशर रंगाचा साठा आढळून आला. कमी दरात मँगो पल्प विक्री करून ग्राहकांची फसवणूक केली जात असल्याचे समोर आले आहे. सध्या ग्रामीण भागात स्वस्त दरामुळे मँगो पल्पच्या आमरसाचा वापर मोठ्या प्रमाणात वाढला असून, यामागे भेसळीचा मोठा उद्योग सुरू असल्याचे स्पष्ट झाले आहे.

या कारवाईदरम्यान तब्बल ३ हजार २८२ किलो भेसळयुक्त व केमिकलयुक्त मँगो पल्प नष्ट करण्यात आला. या कारवाईत सहायक आयुक्त ना. रा. सरकटे, दक्षता विभागाचे अधिकारी वा. औ. शिंदे, स्वा. दा. मस्के आणि प्र. शि. कच्छवे यांनी सहभाग घेतला.

भेसळयुक्त पल्पमुळे जुलाब, उलट्या, पोटदुखी आणि अन्नातून विषबाधा होण्याचा धोका निर्माण होतो. तसेच रासायनिक रंगांच्या वापरामुळे दीर्घकाळात कर्करोगासारख्या गंभीर आजारांचा धोका संभवतो, असा इशारा तज्ज्ञांनी दिला आहे.

स्थानिकांच्या माहितीनुसार, अक्रम गुलाम हा कमी दरात मँगो पल्प विकून इतरांना त्यांच्या नावाने ब्रँडिंग करून देत होता आणि यातून मोठा नफा कमवत होता. या प्रकरणात पुढे अन्न व औषध प्रशासन कोणती कारवाई करते, याकडे सर्वांचे लक्ष लागले आहे.

👉 ग्राहकांनी स्वस्त मँगो पल्प खरेदी करताना सावध राहण्याचे आवाहन प्रशासनाने केले आहे.

Websites Views :