🚩 आदर्श गाव साबुर्डीतून पायी दिंडी सोहळ्याला भव्य प्रारंभ 🚩

दिनांक : 29 जानेवारी 2026 | साबुर्डी (ता. खेड, जि. पुणे)आदर्श गाव साबुर्डी (ता. खेड, जि. पुणे) येथून प्रति पंढरपूर म्हणून ओळखल्या जाणाऱ्या श्री क्षेत्र कडूस येथे पायी दिंडी सोहळ्याचा आज उत्साहात शुभारंभ झाला. ह.भ.प. ज्ञानेश्वर महाराज पिंगळे यांच्या प्रेरणेतून व साबुर्डी ग्रामस्थांच्या पुढाकारातून श्री धर्मनाथ महाराज पालखी दिंडी सोहळ्याचे आयोजन यावर्षी प्रथमच करण्यात आले आहे.

प्रति पंढरपूर मानल्या जाणाऱ्या कडूस येथे दरवर्षी मोठ्या भक्तिभावाने, दिमाखात व उत्साहात भगवान पांडुरंग परमात्म्याचा उत्सव साजरा केला जातो. संत तुकाराम महाराजांच्या टाळकरी परंपरेतील अत्यंत विश्वासू ह.भ.प. गंगाजी बुवा मवाळ यांचे कडूस हे गाव असून, दरवर्षी मार्गशीर्ष शुद्ध दशमीला या दिमाखदार उत्सवाची सुरुवात होते व माघ पौर्णिमेला सांगता होते. पंचक्रोशीतील बहुसंख्य भाविक या उत्सवात मोठ्या श्रद्धेने सहभागी होत असतात.

या पायी दिंडी सोहळ्याचे मार्गात विविध ठिकाणी जल्लोषात स्वागत करण्यात आले. यंदा बुधवार दिनांक 28 जानेवारी 2026 ते 2 फेब्रुवारी 2026 या सहा दिवसांच्या कालावधीत भाविकांना भजन, कीर्तन, प्रवचन, हरिनाम सप्ताह तसेच विविध सांस्कृतिक कार्यक्रमांच्या माध्यमातून या ऐतिहासिक व अभूतपूर्व सोहळ्याचा अनुभव घेता येणार आहे.

या पायी दिंडी सोहळ्यासाठी साबुर्डी गावातील माजी सैनिक शांताराम पाषाणकर, विद्यमान ग्रामपंचायत सदस्य गुलाबशेठ पाषाणकर, माजी सरपंच पंढरीनाथ गायकवाड, माजी सरपंच वंदनाताई गोपाळे, पोलीस पाटील मारुती हूरसाळे, ह.भ.प. यशवंत पाषाणकर, ह.भ.प. मारुती हूरसाळे, निवृत्ती गोपाळे, गणेश गोपाळे, विठ्ठल पाषाणकर, नंदाराम सावंत, युवा कार्यकर्ते प्रशांत गोपाळे यांच्यासह अनेक ज्येष्ठ मंडळी, महिला व तरुण मोठ्या संख्येने सहभागी झाले होते.

हा पालखी दिंडी सोहळा यंदा प्रथमच आयोजित करण्यात आला असून, पुढील काळात दरवर्षी अखंडितपणे पायी दिंडी सोहळा सुरू ठेवण्याचा संकल्प ग्रामस्थांनी व्यक्त केला आहे.

भक्तिभाव, परंपरा व एकोप्याचे दर्शन घडवणारा हा सोहळा साबुर्डी व कडूस पंचक्रोशीत भाविकांसाठी श्रद्धेची नवी वाट ठरत आहे. 🚩🙏

Websites Views :