🏏 अखेर लोणी (धामणी) संघ आंबेगाव प्रीमियर लीगचा मानकरी! 🏆

आंबेगाव | प्रतिनिधी- वैभव काळे पाटील

ग्रामीण क्रिकेटचा उत्सव म्हणून ओळखल्या जाणाऱ्या आंबेगाव प्रीमियर लीग स्पर्धेत अखेर लोणी (धामणी) संघाने इतिहास रचला. तब्बल दहा वर्षांच्या अथक प्रयत्नांनंतर लोणी (धामणी) संघाने या प्रतिष्ठेच्या स्पर्धेत उपविजेतेपदाचा मानकरी ठरत आपल्या स्वप्नाला साकार केले. 🏆✌🏻

२०१५ साली JPL स्पर्धेच्या धर्तीवर सुरू झालेली आंबेगाव प्रीमियर लीग ही ग्रामीण भागातील खेळाडूंना हक्काचे व्यासपीठ देणारी स्पर्धा म्हणून महाराष्ट्रभर नावारूपाला आली. या स्पर्धेच्या पहिल्या पर्वापासून सातत्याने सहभागी असलेला लोणी (धामणी) संघ हा संघर्ष, चिकाटी आणि एकजुटीचे प्रतीक ठरला आहे.

🔹 संघर्षातून यशाकडे वाटचाल

स्पर्धेच्या पहिल्या पर्वात खडकी येथे हनिफभाई मुजावर यांच्या संघमालकीखाली लोणी संघाने सहभाग घेतला होता. त्या काळात लीग क्रिकेटचा अनुभव कमी असतानाही संदीप झेंडे, विशाल वाळुंज, मयूर सरडे, वैभव अशा अनेक तरुण खेळाडूंनी संघ उभा केला. पुढील काळात कधी खेळाडूंनी स्वतः पैसे जमा करून प्रवेश फी भरली, तर काही वर्षे राजू दादा थोरात यांच्या सहकार्यातून संघ खेळत राहिला.

अनुभवातून संघ घडत गेला. जुन्या खेळाडूंच्या जागी वैभव सिनलकर, साहिल कदम, सुलतान, अमित आदक, शुभम आदक, रोहन कदम यांसारख्या नव्या दमाच्या खेळाडूंनी जबाबदारी घेतली. विशाल वाळुंज आजही मार्गदर्शकाच्या भूमिकेत संघासोबत उभा आहे.

🔹 यंदाचा थरारक प्रवास

यंदाच्या हंगामात संघमालक म्हणून अ‍ॅड. भूषण तांबे, राहुल जाधव, श्रीराम वाळुंज, अमोल शेठ कामठे, अक्षयशेठ वाळुंज, सचिनदादा धादवड यांनी धुरा सांभाळली. निलावात सर्व स्थानिक खेळाडूंना संधी देत एकसंघ संघ उभा करण्यात आला. अमित आदकसाठी एक लाखांहून अधिक बोली लागूनही त्याला संघात सामावून घेण्यात आले.

स्पर्धेच्या पहिल्याच सामन्यात मंचरच्या अनुभवी संघावर मात करत लोणी (धामणी) संघाने विजयी श्रीगणेशा केला. सुपर-८ फेरीत चढउतार अनुभवले, पण ‘करो या मरो’ सामन्यात ८६ धावांचा यशस्वी पाठलाग करत संघाने प्रथमच बक्षीसपात्र फेरी गाठली. हा क्षण मैदानात उपस्थित शेकडो चाहत्यांसाठी भावनिक ठरला.

🔹 उपांत्य व अंतिम फेरीतील रोमांच

उपांत्य सामन्यात अवसरी संघाला ६३ धावांत रोखत सहज विजय मिळवला. पुढील सामन्यात पुन्हा मंचर संघावर मात करत लोणी संघाने थेट अंतिम फेरी गाठली.

अंतिम सामना झाला तो बलाढ्य श्रीराम फायटर्स निरगुडसर संघाविरुद्ध. प्रथम फलंदाजी करत श्रीराम संघाने शंभरी ओलांडली. प्रत्युत्तरात लोणी संघाचा पाठलाग कठीण ठरला, मात्र साहिल कदम याने अवघ्या १२ चेंडूत ५१ धावांची वादळी खेळी करत सामना रंगतदार केला. पाच षटकांत पाच षटकार आणि एक चौकार ठोकत त्याने मैदानातील हजारो प्रेक्षकांना अक्षरशः वेड लावले. जरी सामना जिंकता आला नाही, तरी साहिल कदम हा या अंतिम सामन्याचा खरा हिरो ठरला.

🔹 स्पर्धेचे खरे यश

या यशामागे वैभव सिनलकरसारख्या निस्वार्थ खेळाडूंचा मोठा वाटा आहे, ज्यांनी संपूर्ण स्पर्धेत साहिलला पुढे खेळण्याची संधी दिली. तसेच अनेक खेळाडू घडवणारे सुशांतदादा जाधव यांचे मार्गदर्शन साहिलच्या कारकिर्दीसाठी मोलाचे ठरले. मालिकावीर व रायझिंग स्टार किताब साहिल कदमच्या नावावर जमा झाले.

या आनंदाच्या क्षणी संघाचा जुना खेळाडू कै. विघ्नेश वायकर यांची आठवण सर्वांनाच झाली. तो आज स्वर्गातून आपल्या संघाचा प्रवास पाहत असावा, अशा भावना व्यक्त करण्यात आल्या.

🔹 निष्कर्ष

यंदा कोणत्याही राजकीय हस्तक्षेपाविना ही स्पर्धा यशस्वीरीत्या पार पडली. आयोजन समिती, संघमालक, प्रायोजक व सर्व सहकार्य करणाऱ्यांचे विशेष कौतुक होत आहे.

स्पर्धेचा अंतिम निकाल :

🥇 प्रथम – श्रीराम फायटर्स, निरगुडसर

🥈 द्वितीय – शिरसाट स्पोर्ट, लोणी (धामणी)

🥉 तृतीय – सुवर्णयुग, मंचर

🏅 चतुर्थ – विष्णूकाका हिंगे स्पोर्ट, अवसरी बु.

Websites Views :