🛣️ ८ कोटींचा केंदूर–पाबळ रस्ता निकृष्ट; २ वर्षांतही अपूर्ण  अधिकारी, ठेकेदार व लोकप्रतिनिधींची मिलीभगत?

शिरूर प्रतिनिधी : श्री -योगेश लंघे पाटील

केंदूर–पाबळ या अवघ्या ६ किलोमीटरच्या रस्त्यासाठी शासनाने तब्बल ८ कोटी रुपयांचा निधी मंजूर केला. मात्र दोन वर्षे उलटूनही हे काम अद्याप अपूर्ण असून प्रत्यक्ष सुरू असलेले काम अत्यंत निकृष्ट दर्जाचे असल्याचा आरोप ग्रामस्थ आणि सामाजिक कार्यकर्ते करत आहेत.

हे काम मूळतः एका वर्षात पूर्ण होणे अपेक्षित होते. परंतु दोन वर्षांनंतरही रस्ता अर्धवट अवस्थेत असून अनेक ठिकाणी काम बंद आहे. भूसंपादन न झाल्यामुळे काही ग्रामस्थांनी काम अडवले असल्याचेही सांगितले जात आहे.

विशेष म्हणजे, शासन निर्णय २०१९ नुसार कोणतेही रस्ते, पूल किंवा शासकीय काम सुरू करण्यापूर्वी भूसंपादन पूर्ण करणे बंधनकारक आहे. भूसंपादन न करता वर्क ऑर्डर काढली आणि काम सुरू केल्यास संबंधित अभियंत्यांना निलंबित करण्याचे स्पष्ट आदेश शासनाने दिलेले आहेत. असे असतानाही संबंधित अभियंते व मुख्य अभियंते हे नियमांकडे डोळेझाक करत असल्याचा आरोप होत आहे.

शिरूर तालुक्यात आधीच भूसंपादनाअभावी पाच पुलांची कामे बंद पडलेली असताना, त्यावर कोणतीही ठोस कारवाई झालेली नाही. तरीही पुन्हा केंदूर–पाबळ रस्त्याचे काम त्याच पद्धतीने सुरू करून शासनाच्या निधीचा गैरवापर होत असल्याचा आरोप होत आहे.

स्थानिक नागरिकांनी तक्रारी करूनही बांधकाम विभागातील बाविस्कर व राहणे हे अधिकारी कारवाई करण्याऐवजी ठेकेदारांना पाठीशी घालत असल्याचे चित्र आहे.

दोन वर्षांत एकदाही वरिष्ठ अधिकाऱ्यांनी प्रत्यक्ष पाहणी केली नाही, कामाच्या निकृष्ट दर्जावर आक्षेप घेतला नाही, विलंबाबाबत ठेकेदारावर दंडही आकारण्यात आलेला नाही — हे सारे प्रश्न अद्याप अनुत्तरित आहेत.

यामुळे अधिकारी, ठेकेदार व लोकप्रतिनिधी यांच्यातील भ्रष्टाचारी मिलीभगत सामान्य जनतेच्या हक्काच्या रस्ते व पुलांवर डल्ला मारत असल्याची भावना शिरूर तालुक्यातील नागरिकांमध्ये तीव्र होत आहे.

या प्रकरणाची उच्चस्तरीय चौकशी करून दोषींवर कठोर कारवाई करावी, अशी मागणी नागरिकांकडून जोर धरत आहे.

Websites Views :